12/8/15

XEGA XOVEN va participar nel tornéu «Desde el punto de penalti: Alternativas a la prisión»

L'Asociación de mocedá XEGA XOVEN va participar nel tornéu de fútbol interasociativu y reivindicativu «Desde el punto de penalti: Alternativas a la prisión», qu'entamen el Conseyu de la Mocedá del Principáu d'Asturies (CMPA), el Conseyu de Mocedá de Xixón (CMX) y el Conseyu de la Mocedá d'Uviéu (CMU) pa cellebrar el Día Internacional de la Mocedá.
Ye precisu dar protagonismu al desendolcu d'alternatives que tean fora del ámbitu penitenciariu y que de verdá potencien la “resocialización”, “reeducación” y “reinxerción” de les persones penaes. Por ello, dende XEGA XOVEN mandamos les nueses propuestes a la Conseyería de Presidencia d'Asturies, retrucando a la entruga plantegada:
¿Qué alternatives a prisión propondríes qu'ameyoraren la “resocialización” de les persones penaes nel estáu Español?
  • Especificación de les agresiones al colectivu LGTBIQA+ no penal. Según l'Informe sobre incidentes rellacionaos colos delitos d'odiu en España de 2014, aquellos rellacionaos cola identidá o orientación sexual son los más numberosos de los rexistraos, siendo 513. Si siguimos formando a lxs profesionales que tramiten les denuncies pa que les identifiquen de forma específica, vamos llograr tener más datos pa poder estudiar y analizar esti problema con más efectividá.
  • Invertir en prevención de los delitos, con una educación social fuerte, rica en valores d'igualdá de xéneru y respetu a la diversidá. Dende'l colectivu LGTBIQA+, sabemos que'l machismu ye la lacra que xenera'l perfil mayoritariu de persones agresores, yá non solamente escontra persones LGTBIQA+, sinón escontra cualquier realidá diversa que tea fora de la considerada normatividá social. Tien de amenorgase'l problema dende'l principiu, con prevención, sofitando les iniciatives que lluchen contra'l machismu tantu en centros educativos como na vida cultural del país y midíes sociales.
  • Programa tutorizáu d'educación pa la reinxerción social rellacionada col ámbito del delitu. Podría recibir el sofitu d'asociaciones rellacionaes col ámbitu del delitu, calteniendo distancies con xente vulnerable de la asociación. La realización d'esti programa nun tendría de poder sustituyise nin amenorgase en cuenta de una cuantía económica, yá que xenera desigualdaes sociales y la reeducación tres un delitu paeznos ineludible.
  • Trabayos en Beneficiu de la Comunidá a poder ser rellacionaos col ámbito del delitu.
El tornéu de fútbol va tener llugar el 12 d'agostu a les 16.00 hores, nes Instalaciones deportives d'El Cristu d'Uviéu.

Si queréis dir animar al equipu del arcu la vieya... ¡Sois bienvenios/des!