5/9/15

El Topu Fartón 2015, énte la Casa Conceyu d'Uviéu

Como yá sabéis, XEGA forma parte del Llar Solidariu al pie de SOS Racismu Asturies y la Xunta pola Defensa de la Llingua Asturiana. El Llar Solidariu ye un espaciu abiertu a tol mundu, plural, democráticu y autoxestionáu dende'l que defendemos valores d'igualdá, de solidaridá, de llibertá, de xusticia y de paz, que son tresversales a les nueses organizaciones.

Con éses, como cada añu (y van 32), los colectivos enantes citaos montamos mientres les fiestes de San Mateo, n'Uviéu, el yá míticu chiringu Topu Fartón. Recordamos la importancia que tien la presencia de XEGA nuna de les fiestes asturianes que más xente rexunta como exerciciu de visibilidá y normalización. Amás de los oxetivos de sensibilización social sobre'l respetu a la diversidá sexual y d'identidá de xéneru, y la prevención del VIH/sida y otres ITS nun ambiente festivo y distendío, El Topu Fartón tien otra función, más prosaica pero de suma importancia pa la pervivencia de la nuesa Asociación y de les actividaes que desenvolvemos na mesma... Referímonos, ta claro, a la finalidá financiera. El nuesu trabayu voluntariu nel chiringu ye fundamental p'apurrir los recursos económicos necesarios pa caltener tola infraestructura del Llar Solidariu.

Esti añu les fiestes empiecen el vienres 11 de setiembre y terminen el llunes 21. Anque los preparativos empiecen el sábadu cinco. El montaxe empecipia'l domingu seis na Plaza del Conceyu d'Uviéu (por cuenta de les obres de reforma del edificiu de la Universidá d'Uviéu na Plaza Riego) y va enllargase mientres tola selmana hasta la tarde del vienres 11, momentos antes de l'apertura.

El Topu Fartón va abrir al públicu'l vienres 11 tres la llectura del pregón (sobre les 20.30 hores) y hasta el llunes 21 dirán asocediéndose seis turno diarios, cubriendo les 24 hores del día.

El desmontaxe faise dende'l momentu del zarru del chiringu la nueche del llunes 21, cárgase'l camión na plaza y descárgase nel almacén yá'l martes 22. Ye perimportante qu'haya muncha xente, sobremanera teniendo en cuenta que tol mundiu yá va tar escosu y que esi martes ye día llaborable.

Si quies participar activamente n'El Topu Fartón unvia cuanto antes un corréu electrónicu a info@xega.org pa recibir información detallada. Recuerda que toes y cada una de les persones que "trabayamos" n'El Topu facémoslo por activismu, de forma voluntaria y ensin contraprestación económica.