9/8/16

El Topu Fartón 2016, otru añu énte la Casa Conceyu d'Uviéu

Como yá sabéis, XEGA forma parte del Llar Solidariu al pie de SOS Racismu Asturies y la Xunta pola Defensa de la Llingua Asturiana. El Llar Solidariu ye un espaciu autoxestionáu dende'l que defendemos valores d'igualdá, de solidaridá, de llibertá, de xusticia y de paz, que son tresversales a les nueses organizaciones.

Con éses, como cada añu (y van 33), los colectivos enantes citaos montamos mientres les fiestes de San Mateo, n'Uviéu, el yá míticu chiringu Topu Fartón. Recordamos la importancia que tien la presencia de XEGA nuna de les fiestes asturianes que más xente rexunta como exerciciu de visibilidá y normalización. Amás de los oxetivos de sensibilización social sobre'l respetu a la diversidá sexual y d'identidá de xéneru, y la prevención del VIH/sida y otres ITS nun ambiente festivo y distendío, El Topu Fartón tien otra función, más prosaica pero de suma importancia pa la pervivencia de la nuesa Asociación y de les actividaes que desenvolvemos na mesma... Referímonos, ta claro, a la finalidá financiera. El nuesu trabayu voluntariu nel chiringu ye fundamental p'apurrir los recursos económicos necesarios pa caltener tola infraestructura del Llar Solidariu.

Esti añu les fiestes empiecen el vienres 16 de setiembre y terminen el domingu 25. Anque los preparativos empiecen el sábadu 10. El montaxe empecipia'l domingu 11 na Plaza del Conceyu d'Uviéu (por causa, en parte, a los cambeos fechos na Plaza Riego tres la reforma del edificiu de la Universidá d'Uviéu -mobiliariu urbanu nuevu, valláu y faroles qu'antes nun taben- y, per otru llau, la Plaza de la Casa Conceyu ye'l llugar afayadizu pa respetar los protocolos de seguridá y víes d'evacuación) y va enllargase mientres tola selmana hasta la tarde del vienres 16, momentos antes de l'apertura.

El Topu Fartón va abrir al públicu'l vienres 16 tres la llectura del pregón (sobre les 20.30 hores) y hasta'l domingu 25 dirán asocediéndose seis turnos diarios, cubriendo les 24 hores del día.

El desmontaxe faise dende'l momentu del zarru del chiringu la nueche del domingu 25, cárgase'l camión na plaza y descárgase nel almacén yá'l llunes 26. Ye perimportante qu'haya muncha xente, sobremanera teniendo en cuenta que tol mundiu yá va tar escosu y que esi llunes ye día llaborable.

Si quies participar activamente n'El Topu Fartón unvia cuanto antes un corréu electrónicu a info@xega.org pa recibir información detallada. Recuerda que toes y cada una de les persones que "trabayamos" n'El Topu facémoslo por activismu, de forma voluntaria y ensin contraprestación económica.