15/6/18

Actu políticu-institucional y d'entrega de premios 2018

Nel actu institucional d'esti añu va faese un repasada de lo asocedio nestos dolce meses y van esponese les llínees d'actuación para'l futuru inmediatu. Tamién se van apurrir los premios «Lladriyu Rosa», que denuncia actitúes homófobes y discriminatories, y «Triángulu Rosa», que reconoz l'actitú favoratible hacia'l colectivu LGTB+.

L'actu va tener llugar el sábadu 30 de xunu a les 18:00 en La Granxa del Campu San Francisco (Paséu del Bombé, Uviéu).

Programa del actu

  • 18:00 – Apertura del actu y presentación de los/es miembros de la mesa
  • 18:10 – Saludu de representantes de les diferentes entidaes y instituciones sociales, sindicales y polítiques presentes nel actu
  • 18:30 – Entrega de los Premios 28 de Xunu:
    • Lladriyu Rosa (denuncia actitúes homófobes y discriminatories hacia LGTB+)
    • Triángulu Rosa (reconoz la actitú favoratible hacia'l colectivu LGTB+)
  • 18:50 – Intervención de les diferentes Estayes y Grupos de trabayu de XEGA
  • 19:20 – Clausura del actu

(Anti)Premiu Lladriyu Rosa

Olga María del Redentor, priora del Monesteriu de Valdediós, pol so "artículu" tituláu «Homosexualidad o perversidad» publicáu por La Nueva España na sección llamada «Latidos de Valdediós» el 30 de xunu del añu pasáu. Nél, con una pretendida "bondá" acomete contra'l World Pride celebráu'l pasáu añu en Madrid, un eventu de gran visibilidá LGTB. Pa la articulista, tal acontecimientu amás de "murniu", ye "patéticu, degradante y deshumanizante", "manca la sensibilidá de munchos cristianos y tamién de munchos non creyentes que tienen principios morales sólidos y fondos"... «Como si la ciudadanía LGTB nun tuvieramos principios morales sólidos y fondos» comentó Yosune Álvarez. Dexeneración, depravación, viciu y barbarie son otros axetivos emplegaos pola priora de Valdediós pa referise nel diariu asturianu a les celebraciones del Arguyu.

Premiu Triángulu Rosa

Al Equipu de Gobiernu del Conceyu d'Uviéu (Somos Uviéu, Partíu Socialista y Izquierda Xunida) pol pintáu (y repintáu) de los bancos de La Escandalera colos colores del arcu la vieya, símbolu internacional de visibilidá y llucha del colectivu LGTB+. Una de les iniciatives más interesantes d'estos 12 meses. Unos bancos que per un lláu siguieron siendo usaos con normalidá por vecines y vecinos y per otru convirtiéronse en photocall imprescindible para quien visita la ciudá, tresmitiendo una imaxe nueva de pueblu abiertu y respetuosu.

La Granxa

Paséu del Bombé, Campu San Francisco, Uviéu.



Accesu llibre y gratuitu, nun se precisa invitación. Aforu llimitáu.

Habrá intérprete de llingua de signos. Espaciu accesible, ensin barreres arquitectóniques. Si precises acompañamientu del voluntariáu de XEGA pídelo nel teléfonu 985224029 o manda un corréu electrónicu a info@xega.org cola máxima antelación posible.

Invitación


Ésta ye una actividá organizada por XEGA cola collaboración del Ayuntamientu d'Uviéu.