21/6/18

Presentación del llibru «Bitch She's Madonna»

Borja Ibaseta, xestor cultural y filólogu, y Laura Viñuela, consultora de xéneru y musicóloga, van presentar el sábadu 23 de xunu, a les 13:00 hores n'El Orgullín (Camping Municipal de Deva, Xixón) el llibru «Bitch She's Madonna». Nesta edición d'Eduardo Viñuela atopamos un estudiu lúdicu, académicu y multidisciplinar sobro la figura de Madonna, l'artista musical femenina de mayor ésitu de les últimes décades.

Ésta ye una actividá entamada por XEGA, cola collaboración de la asociación cultural El Orgullín y la editorial Dos Bigotes.

Mesa de XEGA n'El Orgullín

XEGA va cuntar el mesmu sábadu 23, de 12:45 a 14:30, con una mesa informativa y de venta de productos qu'ayude a financiar les actividaes de la Asociación el restu del añu. Nella vas poder mercar el to exemplar de Bitch She’s Madonna (nun lo vas atopar en llibreríes hasta'l 25 de xunu).

Bitch She's Madonna

Ser un referente para delles xeneraciones y caltenese nel cume del mundu de la música dende va cuarenta años nun ye una xera cenciella. Y más si yes muyer y si nunca tuvisti reparos en tomar les riendes de la to vida y de la to carrera (trepando coles crítiques, el machismu, la censura… y el pasu del tiempu).

Revesosa y almirada, polémica ya incombustible, Madonna ye una figura clave de la cultura popular. Estudiar les sos múltiples facetes déxanos afondar na industria musical, el videoclip, la moda, la publicidá, el cine, la sexualidá y, como non, la historia de los soníos y los estilos de la música pop.

Bitch She’s Madonna entemez lo lúdicu colo académicu pa averase a la reina del pop dende diversos puntos de vista y desentraña la relevancia de la artista en cada ún de los sos roles: Compositora, cantante, tresgresora sexual, ceadora d'enclinos, muyer de negocios, diva musical, feminista, iconu gai…

Entamáu n'ocho capítulos, el llibru engloba tres bloques temáticos: El primeru céntrase na so música (trabayos discográficos y xires en directu), el segundu trata la so producción audiovisual (cine, videoclips y publicidá) y el terceru analiza los discursos rellacionaos col xéneru y la sexualidá (feminismu, públicu LGTB y sexoloxía).

«Madonna abrió camín y ocupa una posición respetada; nun foi una reina tirana, sinón tolo contrario, rompió cola dinámica patriarcal de la llucha ente dives y apostó pola sororidad […], a pesar de que los medios de comunicación tan enfotaos n'atopa-y una sucesora». De la introducción d'Eduardo Viñuela.

Camping Municipal de Deva

Camín de la Pasadiella 85, Xixón

Cartel