27/6/18

Visita institucional de la Embaxada d'Irán al Principáu

Javier Fernández, presidente del Principáu d'Asturies (FSA-PSOE), va recibir güei 27 de xunu de 2018, víspora del Día del Arguyu, la visita institucional de Mohammad Hassan Fadaifard, embaxador de la República Islámica d'Irán n'España, y Reza Pir Piran, conseyeru económicu de la Embaxada iranina n'España.

XEGA quier espresar la so total desaprobación a tal visita, máxime cuando la presencia del conseyeru económicu de la Embaxada fai presuponer que l'objetivu ye'l fomentu de negocios.

Irán ye un país con una llexisllación declaradamente homófoba que vulnera los derechos humanos más básicos.

La Asociación asturiana llamenta que los intereses del Gobiernu d'Asturies sean esclusivamente económicos y se olviden les nociones básiques d'una sociedá xusta y democrática mientres esistan beneficios financieros de por mediu.

XEGA pide a la Presidencia del Principáu que recapacite sobre les sos prioridaes pa futures recepciones institucionales pa que sean siempre a representantes de países verdaderamente referentes pol so compromisu cola xusticia, la paz y el progresu.