14/6/18

XEGA presenta les sos actividaes del Arguyu n'Asturies y'l fallu de los sos premios añales

Esta mañana, 14 de xunu de 2018, Yosune Álvarez, coordinadora de XEGA, y Christian García presentaron la programación d'actividaes que l'Asociación va desenvolver n'Asturies con motivu del Día Internacional de Llesbianes, Gais, Trans y Bisexuales.

D'ente les actividaes programaes, destaquen especialmente la Manifestación que va tener llugar el sábadu 23 de xunu a la 18:30 con salida del Paséu de Begoña de Xixón y llegada a la Plaza Mayor (Plaza del Ayuntamientu) y l'Actu Políticu-institucional que se va celebrar el sábadu 30 de xunu a les 18:00 hores y que nesta ocasión treslládase a La Granxa del Campu San Francisco d'Uviéu.

Amás dieron a conocer el fallu de los premios añales Lladriyu Rosa, que denuncia actitúes homófobes y discriminatories escontra LGTB+ nel ámbitu asturianu y Triángulu Rosa, que reconoz l'actitú favoratible hacia'l colectivu LGTB+ nel ámbitu asturianu. Dambos premios van ser apurríos nel Actu del 30 de xunu en La Granxa del Campu San Francisco d'Uviéu.

(Anti)Premiu Lladriyu Rosa

Otorgáu nesta edición a Olga María del Redentor, priora del Monesteriu de Valdediós, pol so "artículu" tituláu «Homosexualidad o perversidad» publicáu por La Nueva España na sección llamada «Latidos de Valdediós» el 30 de xunu del añu pasáu. Nél, con una pretendida "bondá" acomete contra'l World Pride celebráu'l pasáu añu en Madrid, un eventu de gran visibilidá LGTB. Pa la articulista, tal acontecimientu amás de "murniu", ye "patéticu, degradante y deshumanizante", "manca la sensibilidá de munchos cristianos y tamién de munchos non creyentes que tienen principios morales sólidos y fondos"... «Como si la ciudadanía LGTB nun tuvieramos principios morales sólidos y fondos» comentó Yosune Álvarez. Dexeneración, depravación, viciu y barbarie son otros axetivos emplegaos pola priora de Valdediós pa referise nel diariu asturianu a les celebraciones del Arguyu.

Premiu Triángulu Rosa

Nesta ocasión recai nel Equipu de Gobiernu del Conceyu d'Uviéu (Somos Uviéu, Partíu Socialista y Izquierda Xunida) pol pintáu (y repintáu) de los bancos de La Escandalera colos colores del arcu la vieya, símbolu internacional de visibilidá y llucha del colectivu LGTB+. Una de les iniciatives más interesantes d'estos 12 meses. Unos bancos que per un lláu siguieron siendo usaos con normalidá por vecines y vecinos y per otru convirtiéronse en photocall imprescindible para quien visita la ciudá, tresmitiendo una imaxe nueva de pueblu abiertu y respetuosu.

Programación Arguyu Asturies 2018

  • Toles actividaes que XEGA desendolcará n'Asturies por causa del Arguyu LGTB+ tán en xega.org/arguyu

Cartel

Volantina

Has caer na cuenta de que se trata de la versión que se ta espardiendo en papel y namá apaecen nella les actividaes conocíes enantes d'imprenta. Pa conocer actividaes nueves, visita xega.org/arguyu