21/9/18

XEGA participará nel III Foru de Pensamientu Social

XEGA va participar na mesa d'alderique titulada «Activismu y cambiu social» que va tener llugar el xueves 27 de setiembre de 2018 a les 19:00 hores nel salón d'actos del Palaciu del Conde de Toreno (Plaza Porlier 9, Uviéu/Uviéu) nel marcu del III Foru de Pensamientu Social entamáu pol Colexu de Ciencies Polítiques y Socioloxía del Principáu d'Asturies, en collaboración cola Asociación Asturiana de Socioloxía.

¿Qué ye'l Foru de Pensamientu Social?

En 2016 presentóse n'Uviéu'l I Foru de Pensamientu Social como espaciu de reflexón, alderique y presentación de les propuestes de profesionales de diversos ámbitos para entender los retos actuales de la sociedá.

Dando continuación al Foru, nel añu 2017 desenvolvióse la so segunda edición, esta vegada en Xixón, siguiéndose'l mesmu formatu que na primera.

Anguaño, sol títulu «Repensar lo humano», el III Foru de Pensamientu Social va tratar de dar cuenta de dalgunos de los grandes cambios que tán socediendo nes nueses sociedaes. A lo llargo de trés sesiones, partíes ente los díes 27 de setiembre, dos y trés d'ochobre, profesionales y espertos en trés estayes d'estudiu distintes –activismu social, economía collaborativa, y teunoloxía y sociedá amosaráse la cambiante naturaleza de lo social y la constante necesidá de repensala de cutio.

El “ser humanu” nun ye daqué estáticu, sinón un “animal social” en constante evolución, que colos sos actos non yá tresforma a les sociedaes sinón que tamién da forma a nuevos fenómenos sociales. D'ende qu'en definitiva al traviés de les meses d'esti Foru convidar a cavilgar y repensar qué entendemos por “humanu”, y los principales retos y tresformaciones a los que les nueses sociedaes van tener que faer frente nos próximos años.

¿Cuál ye'l fin del Foru?

El Foru ye un espaciu para la reflexón sobro los principales enclinos y retos de la sociedá actual. El principal fin ye que tescienda a la sociedá civil, que los mensaxes y les reflexones sirvan d'información pa quien tomen decisiones. D'esta miente, espérase que los conteníos surdíos de los alderiques contribuyan a ameyorar la conocencia sobro los principales enclinos sociales nuna sociedá global, y sobremanera lo que podríamos faer p'ameyorar el futuru del nuesu texíu económico y social.

¿Quién lu organiza?

El Foru ta entamáu pol Colexu de Ciencies Polítiques y Socioloxía del Principáu d'Asturies, en collaboración cola Asociación Asturiana de Socioloxía (AAS).

¿Qué temes van ser abordaos?

La tercer edición del Foru, sol títulu de «Repensar lo humano», va centrar en trés estayes d'estudiu y reflexón que van ser encetaes so óptiques diverses:
  • Activismu y cambiu social. Al traviés de les redes sociales y de les nueves teunoloxíes ta produciéndose tou un movimientu activista en distintos campos que xenera nueves formes de pensar impensable n'otra dómina. La velocidá a la que flúi la información dexa xenerar un cambéu nel discursu social sobro ensame de cuestiones y collo nel diseñu de polítiques ya inclusive el discursu de los distintos partíos políticos.
  • La teunolóxica “naturaleza” de lo social. “Ensin la técnica l'home nun esistiría nin esistiría nunca”. Con estes palabres Ortega y Gasset enfusó a la filosofía per vegada primera al estudiu de la teunoloxía, un ámbitu que pa él yera clave  a la d'entender al ser humanu. Anguaño la cuestión de cómo la teunoloxía afecta a la sociedá convirtióse nuna cuestión que va más allá del ámbitu filosóficu. Les meyores biomédicos, la “dixitalización” del mundu llaboral, la eclosión de les nueves teunoloxíes de la comunicación, les meyores en robótica ya intelixencia artificial, etc. constitúin anguaño temes d'alderique clave  a la d'entender la sociedá del sieglu XXI.
  • Formes alternatives de consumu: Ente la política, l'estilu de vida y el capitalismu reencarnáu. Desque se sentaren les bases del consumu collaborativu a empiezos de los 2000, ésti pasó de ser recibíu casi unánimemente con entusiasmu a espertar munches rocees. La dimensión social prometida paez esleise ente'l consumu políticu, la construcción identitaria o los nuevos nichos de mercáu dientro de la economía capitalista. Esti posible alloñamientu de los sos principios orixinales llévanos a preguntar si vamos asistir a un futuru collaborativu.

    ¿Cómo se organiza?

    A lo llargo de trés sesiones, una sobro cada tema, distintos participantes van esponer los sos planteamientos. Un conxuntu de nueve ponentes y trés moderadores van representar sectores distintos de la sociedá, dende l'activismu y los movimientos civiles, pasando pola teunoloxía hasta la economía collaborativa.

    Esta tercer edición del Foru va cuntar tamién con una sesión de vídeu fórum na que se va presentar el documental «Yes, We Fuck».

    ¿Cuándo y aú se cellebra?

    Les trés meses d'alderique y la sesión de vídeu-fórum van cellebráse mientres los díes 27 de setiembre, dos y trés d'ochobre de 2018 nel salón d'actos del Palaciu del Conde de Toreno (Plaza Porlier 9, Uviéu).

    ¿Cuál ye'l calendariu y la composición de les meses d'alderique?

    Vídeu fórum: Documental «Yes, We Fuck!»

    • Día: 27 de setiembre de 2018
    • Hora: 12:30
    • Ponentes:
      • Antonio Centeno Ortiz. Activista del Foro de Vida Independiente
      • María Rodriguez Suárez. Doctora en xéneru y diversidá
    • El documental cuntará con intérprete de lingua de signos
    • Yes, We Fuck! ye un documental que quier encetar la sexualidá en persones con diversidá funcional. Más allá del sexu, el documental quier amosar non yá qué puede faer la sexualidá poles persones con diversidá funcional, sinón tamién qué puede apurrir la realidá de la diversidá funcional a la sexualidá humana. La diversidá de la sexualidá, el sentíu ampliu de la guapura y la llucha pola independencia personal van ser l'oxetivu de les hestories que Yes, We Fuck! va amosanos.

    Mesa 1: Activismu y cambiu social

    • Día: 27 de setiembre de 2018
    • Hora: 19:00
    • Modera: Sandra Losada Menéndez. Vicedecana del Colexu de Ciencies Polítiques y Socioloxía del Principáu d'Asturies
    • Ponentes:
      • Antonio Centeno Ortiz. Activista del Foro de Vida Independiente
      • Yosune Álvarez Barragán. Coordinadora de XEGA
      • Sandra Dema Moreno. Profesora de socioloxía, Universidá d'Uviéu

    Mesa 2 La teunolóxica “naturaleza” de lo social

    • Día: 2 d'ochobre de 2018
    • Hora: 19:00
    • Modera: Germán Hevia Martínez. Presidente de la Asociación Asturiana de Socioloxía
    • Ponentes:
      • José Antonio López Cerezo. Catedráticu de llóxica y filosofía de la ciencia na Universidá d'Uviéu
      • Fernando Broncano Rodríguez. Catedráticu de filosofía de la ciencia na Universidá Carlos III de Madrid
      • Montserrat Guardia Güell. Directora de desafíu dixital y teunoloxíes emerxentes del Bancu Sabadell

    Mesa 3: Formes alternatives de consumu: Ente la política, l'estilu de vida y el capitalismu reencarnáu

    • Día: 3 d'ochobre de 2018
    • Hora: 19:30
    • Modera: Carlos Gil de Gómez Pérez-Aradros. Politólogu, Cuerpu Superior de Alministraores del Principáu d'Asturies
    • Ponentes:
      • Amparo Novo Vázquez. Profesora de socioloxía y ciencia política, Universidá d'Uviéu
      • José Ángel García Tomás. Ouishare n'Asturies
      • Enrique Pañeda Reinlein. Profesor xubiláu de la Universidá y participante en delles plataformes y colectivos sociales y vecinales

    Cartel


    Volantina